Pakkio Bunting Mangkasara

Iya dende ‘Iya dende

Nia tojemmi

Bunting salloa kutayang

Salloa kuminasai.

Nampaki ri ujung bori’

Ri cappa Pakrasangangku

Ku’rappo cini

Kutimbarangngi pangngai.

Kuassennta lania

Nakuitungki labattu

Ku’ragi memang

Berasa ri mangko kebo’.

Nakupasadia  batta

Rappo ripala’ limangku.

Kunnanro memang

Leko’ ri talang bulaeng.

Kuntu intang maccayata

Nibelo-belo jamarro, makilo-kilo

singarra dallekanta

Labbiri’ nuparamata

Jamarro moncong bulonu

Bulaeng ti’no

Ansuloi paccinitta

Lekukapeangki anne

Sumangatta mabellayya

Ku kiyo’ tongi

Tubuhta sallo lampayya

Baji kualleko anne

Bunga-bunga tamalatea

Latei bunga

Tamalate cinikanta

Sikuntu’ sanrapangtongki

Bulang simombo’ I Raya

Nasussung pale

Natinriang wari-wari

Wari-wari kapappassang

Pale’ mannuntungi bangngi, nisailenu

Tamalajju cinikanta

Nicini’ ma’mole-mole

Ma’mole-mole nikio’ Daeng

Ni pakalompo

Nikanro ana’ karaeng

Kupattannangngangki anne

Tope talakka ri aya’

Malakka tope

Tamalakka’ki I katte

Nutuli manai mae

Ri balla’na matoanta

Matoang masunggu

Ipara’ tulimangngamaseang

Mangngonjo’ tommaki anne

Tuka’ tallua anronna

Andakkai

Sampuloa baringanna

Majjappu’ tommaki pole

Coccorang nita’bu ta’bu

Numannyorong

Pakke’bu’ digiring-giring

Tulusu’maki nai’

Ammalo ri paddaserang

Ri kale balla

Dapara nilapa’ jali’

Dasere’ nijaling kawa’

Nanianrong bassi kalling

Nisailei

Narau kanja nicini’

Nanumaddakkamo pole

Rapa’langga batang rappo

Mannoso tongki’

Ma’dongko ri tau-tau

Nanutulimo antama

Rawanganna timbaota

Ri benteng polong

Tappere’ paramadani

Ajjo’jo kiri kanang

Massuro suro rapanta

Numapparenta, mappatuju sangkammanta

Naremba-rembaki pole

Ana’ rara patampulo

Nitumaningi

Rilonrong beru ma’bakka

Benteng polong kana sako

Kanako benteng pakkai kai’ topenu

Pasikai simbolennu

Manai’ manaungko sallang

Turi bara’ baranginnu

Assulu’ antama’, ata maballa’ balla’nu

Numajjangang rassilerang, numattedong rassi bara

Nakatumbangngang, palangga ase berunu

Nakatepokangi pole, dodoso’ ase toanu

Nalamporo’nu

Tana alle passinringang

Tamanraikko ri ambong

Takalaukko ri jawa

Nanukuasa, kalummannyang barang-barang

Tama’botoro’ nummeta, tamaddangngangko nulaba

Caddi resonu, namalompo wassele’nu

Asse’re se’reko sallang, ri matoang kasi-asi

Nummannulungi, ipara’ kamase-mase

Nai’mi sallang tuannu, salladasere’ dalle’nu

Lompo arenne, kaleleang mange-mange

Kuminasaiko sunggu, kutinjakkiko mate’ne

Nusunggu tojeng, numate’ne tojeng-tojeng

Labbui bannang ri Jawa, labbuangngangi umuru’nu

Lampoi lino, lompoang rawa-rawanu

Lebba gentung timbaonu, lebba’ tantang pakkalli’nu

Nikida-kida, timbao ni ura’ tallu

Lebba’ basami ba’ra’nu

Lebba gusu’ langiri’nu

Tattannang tommi, capparu’ pa’minyakannu

Nanutulimo antama, ri bili’ kamulianu

Mannoso’ badang, annimbang bangkeng pacciko

Nukana kanami sallang, saraka ripamminangnga, tapau pau

Bunga rikatinroannu, musigala gala genre’

Nusireppe rappo toa

Nusippattoa, nusipaccammo cammoi nusilappa’ leko’ toa

Nusipattoa toai, sitanro takkang, sibuccu pa’dengka dengka

Numa’mana’ mana’ sarre

Numa’borong unti jawa

Pinruang se’re, numajjarimo tamanang

Lino-linopi anging, nubokoi toppi langi’

Puppusu’ takkang, pakkeke mappasisalla

Manai ngasemmi mae, anrong guru ningainnu

Anrong taunnu, kapala’ nipaemponu

Battu ngasemmi anjo pole, bijannu pammanakkannu

Bella bellanu, sanggenna turikalennu

Nipanai’mako sallang, ripangka’ pangka bulaeng

Nanipaempo, nadallekang pangngaddakkang

Sipoko’ bu’nemi sallang, tantanna je’ne matannu

Sipoko camba, pa’matti’na eloro’nu

Kupattannangngangko anne, anggoro’ ri ganturonu, kupa’lamungang

Lemo tanneng ri dolangang

Nakacinnala somba, nakanakkukanga manggau’

Napamattikang, eloro’ bate salapang

Bunting nilekkakko pole

Tunipa’lele ballaka ripa’rasangang

Bori’ nampa nula’bakki, kamma tommako anjo sallang

Jonga matoa ri sampa’ mannawa nawa

Mangngayangngang tuni malo